LAOAG CITY – Nakasaganan ti pannakaipatungpal ti Peoples Survival Fund nga agdagup ti nasurok a 305 a milyon a pisos ditoy probinsya.
Segun ken ni Mr. Hashler Garalde iti Provincial Agriculture Office, pinirmaan iti immun-una a gundaway da Finance Sec. Ralph Recto a chairan ti Peoples Survival Fund Board ken ni Gob. Matthew Marcos Manotoc a nangibagi iti Provincial Government of Ilocos Norte ti katulagan.
Inbatadna a naisaguday iti nasao a katulagan ti pannakaipatungpal ti proyekto a napauloan ti Ilocos Norte Climate Resilient Intervention towards Sustainable Agriculture and Natural Resource Management.
Inlawlawagna a ti Peoples Survival Fund ket maipaay a kas grant iti gobierno probinsyal iti laksid nga adda ti counterpart ti probinsia para iti implimentasyon dagiti nagduduma nga aktibidad nga agdagup iti tallopulo ket innem a milyon pito gasut a ribu a pisos (36,700,135) iti babaen ti serbisio, taraon ken dadduma pay a kontribusyon.
Kunana a naisaguday pay iti Memorandum of Agreement a dagiti stakeholders nga agbibinnulig iti nasao a proyekto ket ti Mariano Marcos State University (MMSU) dagiti Local Government Units iti ciudad ti Laoag ken Batac, kasta pay iti ili ti Paoay, San Nicholas, Badoc, Pinili, Nueva Era, Sarat, Burgos, Vintar, Dingas, ken Solsona pakairamanan ti Department of Environment and Natural Resources ken dagiti gunglo dagiti mannalon iti Ilocos Norte.
Innayon ni Garalde a ti nasao a proyekto ket buklen ti uppat a component no sadinno a ti umuna ket ti pannakaiyestablisar ti maysa nga Small Water Impounding Project wenno SWIP, 30 nga Small Farm Reservoir ken innem a Solar Powered Irrigation Project.
Innayon na a ti Component 2 ket ti pannakapasayaat ti soil laboratory iti Mariano Marcos State University, “soil fertility mapping” ken ti pannakaestablisar ti pilot organic fertilizer production facility idinto a ti component 3 ket pakairamanan ti “validation” kadagiti lugar para iti Agro-forestry, pannakaiyestablisar ti nursery ken agri-forestry.
Malaksid iti daytoy, ti component 4 ket pakaibilangan ti Site development, construction ken ti pannakaikabil kadagiti kagamitan ken dagiti dadduma pay a masapsapul para iti Climate Field School (CFS), pannakaideploy ti 50 nga Automated Weather Station and Field Sensors, ken ti Development ti Web Applications and Weather Database.
