LAOAG CITY – Nagpalagip ni Ms. Mylene Pascual, ti mangidadaulo iti City Environment and Natural Resources ditoy ciudad ti Laoag iti publiko nga agitugot ti bukod a panganan no agturong kadagiti pagpasyaran ita a semana santa.
Kunana a babaen iti daytoy a wagas ket maliklikan ti naruay a basura a makaperdi iti aglawlaw.
Inbatad na a nasaysayaat no agbalon laengen ti kutsara ken tinidor kasta met ti pinggan tapno usaren no agpapangan iti pagpasyaran.
Malaksid iti daytoy, inpakaammo na a nakisarita da kadagiti pasdek negosyo ditoy ciudad a paglalasinen dagiti basura ken laglagipen ti pagalagadan seknan iti single use plastic.
Segun kenkuana, masapol a mapagtalinaed ti kinadalos iti aglawlaw sakbay nga agturong dagiti turista ken no pumanawen dagitoy.
