LAOAG CITY – Naragsak nga inpakaammo ni Engr. Neil Jose, ti dati a National President iti Pugad Lawin a mangidiayada ti free bus ride wenno libre a panaglugan kadagiti deboto nga awan ti luganna para iti Visita Iglesia inton bigat, aldaw ti Huebes Santo.
Segun ken ni Jose, naobserbaranda nga adu dagiti tattao ti marigrigatan tunggal madanon ti Visita Iglesia gapu ta awan ti pagluganan dagitoy.
Inbatadna nga adda ti dua a bus ti Pugad Lawin ti mausar a pagluganan dagiti deboto nga agpasiar kadagiti pito a simbaan.
Kunana a ti kada simbaan a pagpasiaranda ket maikkan laeng ti agarup 20 a minuto dagitoy gapu ta agaadayo dagiti simbaan a pagturunganda.
Inlawlawagna nga alas sais ti bigat ti umuna a bansada idinto nga alas dose ti pangaldaw ti maikadua a bansada nga agpada iti sango ti Kapitolio Probinsial ti assembly venue.
Naammoan a karaman kadagiti simbaan a bisitaenda ket ti Mangato Church, Paoay Church, Currimao Church, Badoc Church, Sinait Church, Batac Church ken ti San Nicolas Church.
Mainaig iti daytoy, malaksid iti maidiaya a free ride ket mangipaay pay ti grupo ti danum ken taraon para kadagiti deboto.
Kabayatanna, naammoan a daytoy ti maikadua a daras a nangidiayada ti free bus ride para iti Visita Iglesia.
