LAOAG CITY – Inpasigurado ti Department of Health a nakasagana dagiti ospital iti pagilian tapno akomodaren ti aniaman a klase ti emergency cases nga adda ti pakainaiganna iti nabara a panawen ita nga Holy Week.
Inbatad ni Health Secretary Teodoro Herbosa nga addan iti code white ti pampubliko nga ospital iti pagilian.
Karaman kadagiti manamnama nga emergency cases ket heat stroke ken dehydration pakairamanan ti pannakalmes.
Binalakadan ni Herbosa ti publiko a napateg a pagtalinaeden a protektado ti bagi kontra iti napudot a paniempo.
Kunana a kadagiti agturong iti baybay wenno agpasiar kadagiti nagduduma a destinations ita a panawen ti semana santa ken bakasion, inpetteng ni Herbosa a nasken a kanayon nga hydrated wenno kanayon nga uminum ti danum, saan unay nga agbilag iti init ken aglinong.
