LAOAG CITY – Inpasigurado ti Department of Health a dagiti kaso ti monkeypox nga inpadamag ti Davao City Health Office ket manipud iti Clade II variant ti virus ket saan a narisgo maidasig kadagiti immuna a naipadamag.
Basar iti Department of Health, nagtalinaed iti kapada nga antas ti risgo ngem inlawlawag ti ahensia a ti pasiente a pimmusay ket saan a mismo a gapu iti monkeypox no di ket gapu iti komplikasion nga adda ti pakainaiganna iti nakaro a kondision.
Inlawlawag ti Department of Health nga epektibo ti agdama nga addang iti panangsolbar ti monkeypox.
Insigida a na-detect ken na-isolate dagiti kaso idinto a naiget a mabanbantayan dagiti amin a close contacts.
Kuna pay ti ahensia a ti masansan a sintomas ti monkeypox ket dagiti lamma iti kudil wenno mucosal lesions nga agbayag ti dua agingga iti uppat a lawas kagiddan ti panaggurigor, panagsakit ti ulo ken bagi, panagkapsot.
