LAOAG CITY – Naragsak nga inpakaammo ni Atty. Charito Malicad, mangidadaulo ti City Tourism Office ditoy siudad ti Laoag nga adu dagiti turista a nagturong kabayatan ti Semana Santa ditoy siudad ti Laoag.
Segun kenkuana, ti kangrunaan a nagturongan dagiti turista ket iti sentro ditoy siudad ken iti Laoag Sand Dunes.
Inbatadna nga awan met dagiti nagbalin a problema dagiti turista kabayatan iti panagturongda ditoy siudad kangrunana kadagiti kabaybayan.
Mainag iti daytoy, inpakaammo ni Atty. Malicad a kasapulan iti panagtitinnulong tapno mapintas dagiti lugar a pagpasiaran ditoy siudad ken ad-adu pay dagiti turista nga umay ag-invest.
Malaksid iti daytoy, kunana nga agtultuloy ti suportada kadagiti aglaklako iti paset ti Sand Dunes tapno in-inut a makabangon dagitoy.
Kabayatanna, kitkitaen pay ti City Tourism Office dagiti mapasaayat a tourist spot ditoy siudad ti Laoag tapno agtultuloy a magutigot dagiti turista a bumisita ditoy probinsia.
