LAOAG CITY – Iti kabanbantayan idiay Panama, maysa a naisangsangayan a kayo ti nakakigtotan dagiti sientipiko no sadinno a saan laeng a maka-survive iti kimat no di ket ad-adda a puminpintas no makimat.
Ti kayo nga almendro wenno Dipteryx oleifera ket kabaelanna a mabiag kalpasan a matamaan ti kimat idinto a dagiti kaabayna a kayo ket maur-uram ken matmatay.
Inbatad ni Evan Gora, maysa a forest ecologist, nakitana nga idi 2015 ti maysa nga almendro nga arig awan ti pannakadadaelna kalpasan a makimat.
Naammoan nga idi mangiwayat ti naun-uneg a panagadal ni Gora ken ti grupona iti Barro Colorado Nature Monument, naduktalanda nga amin nga almendro a tinamaan ti kimat ket nakalasat idinto nga agarup 64 a porsiento ti dadduma a kayo a tinamaan ket natay iti uneg ti dua a tawen.
Rumrummuar iti panagadal a ti almendro ket nangatngato ken nalawlawa a crown maidasig iti dadduma a kayo rason a dakdakkel ti tsansana a matamaan ti kimat.
Kabayatanna, iti baet a saan pay a masigurdo no kasano daytoy a makalaslasat iti kimat ngem adda ti atapen dagiti eksperto nga adda ti pakainaiganna daytoy iti natural daytoy a conductivity.
