LAOAG CITY – Inbatad ni Lt. Junior Grade Roger Benito Jr., ti Sub-Station Commander iti Coastguard Sub-Station iti ili ti Pasuquin a nakikoordinar da a dagus iti Philippine Navy kalpasan nga indanun dagiti mangngalap iti nasao nga ili ti problema da nga adda dagiti Vietnamese nationals a mapan mangkalkalap kadagiti payaw wenno rama da.
Segun ken ni Benito, in-radio channel ti Philippine Navy ti maipagarop a Vietnamese vessel ngem saan a sumungsungbat daytoy.
Nupay kasta, kinumpirmaran ti Philippine Navy nga adda ti namonitor da a mapagduduwaan a dua a vessel.
Mainaig iti daytoy, kuna ni Benito a nangisayangkat ti seaborne dagiti personnel da ngem saan da a nadanun ti lokasyon gapu ta pimmigsa ti dalluyon ken angin.
Nagkiddaw da metten iti Coastguard ili ti Burgos ti seaborne a kabaelan na ti agpatrolya iti lugar, kasta pay iti floating assets iti Provincial ken Regional Office da.
Inpasingked ni Benito nga ikarigatan da a tuntunen ti lokasyon dagiti maipagarop a Vietnamese Vessel tapno mapapanaw dagitoy.
Immuna iti daytoy, inbatad ni Brgy. Chairman Jesus Agbalog iti Brgy. Davila iti ili ti Pasuquin nga indanun kenkuana dagiti kalugaran na a mangngalap nga adda dagiti Vietnamese nationals a mapan mangkalkalap kadagiti payaw wenno rama da iti kabaybayan a paset ti nadakamat ng ili.
Gapu iti daytoy, kuna na nga insigida a napanna kinataripnong dagiti maseknan a mangngalap ken indanun da a dagus ti problema iti Philippine Coastguard.
Inrakurak ni Agbalog a possible nga iti rabii ti papan panagkalap dagiti gangannaet kadagiti rama dagiti kalugaran na gapu ta awanen dagiti agbanbantay.
Innayon na a ti us-usaren dagiti gangannaet ket ti sigay a maminpinsan a mangtakal kadagiti lames isut gapuna a no mapan dagiti kalugaran da ket awanen ti makalap da.
