LAOAG CITY – Saan nga inpabus-oy ti defending champion a National University uray sigurado dagitoyen iti No. 1 seed ken pananggun-od ti twice-to-beat advantage iti UAAP Season 87 women’s volleyball tournament.
Daytoy ket kalpasan a nakairekord latta ti panagballigi ti Lady Bulldogs kontra iti University of Sto. Tomas iti iskor a 23-25, 25-17, 25-18, 22-25, 15-9 iti Smart Araneta Coliseum.
Napadayawan kas Best Player of the Game ni Mhicaela “Bella” Belen kalpasan a tinulungan ti National University a nagun-od ti 12 a panangabak iti 14 nga ay-ayam iti torneo nga addaan ti eight-team double round robin eliminations.
Nakaaramid ni Belen ti 26 points manipud iti 24 nga attacks ken dua a blocks para iti Lady Bulldogs a sangoen ti No. 4 seed a Far Eastern University iti semifinals.
Nupay kasta, sakbay a nangrugi ti semis ket aglaban pay laeng ti UST ken De La Salle University para iti No. 2 spot ken pananggun-od ti twice-to-beat bonus.
