LAOAG CITY – Naikeddeng nga agsubli iti entablado ti sibubukel a BTS kalpasan ti sumurok dua a tawen a panaginana gapu iti mandatory a military service-da.
Lippasen da RM ken V ti serbisioda inton Hunio 10, kagiddan da Jimin ken Jungkook inton Hunio 11. Ni Suga ti maudi a rummuar inton Hunio 21 a mangipasimudaag iti panagsubli ti grupo sakbay a malpas ti kagudua ti tawen 2025.
Immunan a nakumpleto da Jin idi Hunio 2023 ken J-Hope idi Oktubre 2024 ti military duty-da isu a nasapsapa a nakita isuda iti publiko.
Inbatad ni HYBE CEO Lee Jae-sang, narugianen ti panagsagsagana para iti comeback ti grupo pakairamanan ti pannakikoordinar kadagiti nalatak a songwriter.
Nupay kasta, inpettengna a kasapulan a maikkan ti panawen dagiti miembro tapno makapagsagana a naimbag.
Maipanggep iti world tour, kuna ni Lee a posible a mabayag pay daytoy gapu ta masansan nga isarsaruno daytoy kalpasan a mabukel ti baro a musika.
