LAOAG CITY – Mamati ti National Police Commission (NAPOLCOM) a saan nga isolated cases dagiti nagsasaruno a pannakairaman ti sumagmamano a kameng ti Philippine National Police (PNP) iti sumagmamano a saan nga umiso nga aramid.
Daytoy ti inpetteng ni National Police Commission Commissioner and Vice Chairperson and Executive Officer Atty. Rafael Calinisan kalpasan a naibaga a dagiti nagbalin nga insidente ket agpapada nga isolated cases laeng.
Kuna na a maladingitan ken makaparurud dagiti mairekrekord nga insidente a pakairamanan dagiti pulis kangrunaan na no dagitoy ket saan nga usto nga aramid.
Inpetteng ni Calinisan a maysa a dakkel a kinaulbud dagiti mangibagbaga a ti nagbalin a panaglabsing ti sumagmamano a pulis ket labeled kas isolated a kaso laeng.
Gapu iti daytoy, makitkita ti ahensya nga adda ti rumbeng a mabaliwan iti proseso ken set-up ti Philippine National Police tapno maliklikan dagiti kastoy nga isyu a pakairamramanan dagiti rumbeng nga agbantay ken mangipatalged ti seguridad ken kapya para kadagiti Pilipino.
Mainaig iti daytoy, inpakaammo ni Calinisan a target ti National Police Commission a pagbalinen nga al-alisto ti pannakaiproseso dagiti kaso ken dalusan amin a backlogs dagiti report a pakairamramanan dagiti pulis.
Inpaganetget ni Calinisan a saan a mabalin nga ibaybayag ti panangsolbar dagiti kaso kangrunaan na no dagitoy ket dagiti panagabuso a nakairamanan dagiti kameng ti pulisya.
