LAOAG CITY – Manamnama nga iti oras ti alas-nuebe intono bigat iti rabii, Mayo 12 ket maamoan ton no siasinno dagiti mangabak iti eleksyon para iti lokal a posisyon.
Daytoy ti inpasigurado ni Atty. Julius Balbas, ti Commission on Election Officer ditoy ciudad ti Laoag.
Segun ken ni Balbas, malpas ti panagbotos iti oras ti alas-siete ti rabii intono bigat ken kalpasan iti daytoy ket mabilang a dagus dagiti botos.
Kuna na nga alisto laeng a maamoan dagiti mangabak para iti lokal a posisyon gapu ta alisto ti panagimprenta dagiti Automated Counting Machines.
Immunan nga inpakaammo ni Balbas nga adda ti pakabuklan nga 44 a pagadalan ti mausar a voting centers no sadinno nga addaan ti 116 polling precincts a pagbotosan ti 82, 866 a ribo a botante ditoy ciudad ti Laoag.
Mangnamnaman ti comelec officer nga agtalinaed ti linak, urnus ken talna agingga a malpas ti eleksyon.
