LAOAG CITY – Nagyamanan ni Presidente Ferdinand Marcos Jr., dagiti amin a Pilipino a nagbotos iti kalepleppas a midterm elections.
Iti rakurak nga inpruk-at ti Presidente, inpalgak na a naipakita manen ti pagilian ti anag ti demokrasya, iti babaen ti natalna, naurnus ken addaan ti dignidad nga eleksyon.
Agtalek ni Presidente Marcos kadagiti naelektaran nga opisyal a dumngeg iti arungaing ti umili, nakasagana da a mangsolbar ken sumango kadagiti karit ti inflation, trabaho, korapsyon ken iti inaldaw a mangpadpadagsen kadagiti Pilipino.
Saan met a nalipatan ti presidente ti nagyaman kadagiti umili a nangbotos ken nangsuporta kadagiti kandidato ti administrasyon.
Kuna na a saan man nga amin nga inyedorsar ti administrasyon ket nangabak partikular ti 12 a senatorial candidates ket agtultuloy latta ti misyon ken panagtrabaho da.
Inpaganetget met ti Presidente kadagiti saan a napagasatan a nangabak a respetaren na ti kinatured ken ti panagkumitda iti serbisio publiko.
Nagpanawagan ti presidente a nalpasen ti eleksyon isut gapuna nga itultuloy ti agtrabaho ken saanen a sublianan ti napalabas no di ket ipamaysa ti masangwanan.
