LAOAG CITY – Maiyuswat ti dredging iti Galpac creek iti ili ti Paoay ken desilting iti Daorao creek ditoy ciudad ti Laoag babaen ti Department of Public Works and Highways – Regional Office 1.
Segun iti pannakabagi ti Department of Public Works and Highways – Regional Office 1, ti Galpac creek dredging ket mangrugi iti Brgy. Masintoc agingga iti Brgy. Paratong idinto a ti Daorao creek ket manipod iti Brgy. Caoacan agingga iti Brgy. Casili.
Inlawlawag na a ti Galpac creek ket 12 a kilometro ti kaatiddog na ken ti Daorao Creek ket 10 a kilometro.
Kunana a daytoy a proyekto ket paset iti administration project nga iyimplementar ti Department of Public Works and Highways – Regional Office 1.
Kabayatanna, dinayaw ti chairman ti Committee on Public Works ti nasao a proyekto aglalo ket dakkel a problema ti panaglayus ditoy ciudad gapu ta silted unayen ti nasao a creek ken gapu kadagiti water lily ket saan nga agayus a nasayaat ti danum isut gapuna kumamang ti danom kadagiti pagtaengan.
Mainaig iti daytoy, inaprobaran ti Sang Panlalawigan ti resolusyon a mangipalubos iti Department of Public Works and Highways a mangipatungpal ti nasao a proyekto tapno mapondoan daytoy ken insigida a maiyimplementar.
