LAOAG CITY – Umabot iti tallo a milyon nga estudyante ti agkasapulan ti tulong gapu iti learning gaps.
Daytoy ket basar iti assessment ti Department of Education (DepEd).
Inrakurak daytoy ti Department of Education kalpasan ti nagbalin a duktal ti Philippine Statistics Authority nga adda ti 5.58 milyon nga high school graduates a maibilang kas “functionally illiterate” wenno marigatan nga agbasa ken saanda a maaw-awatan ti basbasaen da.
Inlawlawag ni Department of Education Undersecretary Gina Gonong nga ado dagiti problema ken factors no apay a mapaspasamak dagitoy isut gapuna a rumbeng a pagtinnulungan dagiti mangisursuro ken nagannak tapno masursurwan a naimbag dagiti agad-adal.
Inpakaammo ni Gonong nga adda ti Academic Recovery and Learning (ARAL) Program ti Department of Education a maipatungpal iti daytoy panagseserrek a gagem na a masolbar ti learning gaps.
Innayon na a dagiti agad-adal nga adda iti Grade 1-10 a nababbaba ngem ti minimum proficiency levels ket kasapulan ti panagbasa da iti mathematics idinto a science met dagiti Grade 3-10.
Iti babaen ti Academic Recovery and Learning (ARAL) Program ket ditoy a matingiting no siasinno dagiti agkasapulan para iti tutorials ken naan-anay a dumalan iti dadduma a programa iti ruwar ti classroom.
Ti tutorials ket maiyuswat iti saan a nalablabes ngem maysa nga oras iti kada aldaw para iti weekend programs ken ipatungpal daytoy ti nagduduma a mangisursuro.
Inrakurak ni Gonong a para kadagiti pampubliko a pagadalan ket maipatungpal ti programa a libre.
