LAOAG CITY – Umabot iti 30 nga atleta ti inasistiran dagiti medical team iti umuna nga aldaw a pannakaiyuswat dagiti sporting events para iti Palarong Pambansa 2025.
Daytoy ti inbatad ni Fire Supt. Roxanne Parado, ti Provincial Fire marshall iti Bureau of Fire Protection ditoy probinsya.
Segun ken ni Parado, malaksid iti panagsuplay da ti danom ken panagbantay kadagiti nagduduma a billeting areas ken playing venues, nabilin da pay a mangasisitir kadagiti medical team.
Inlawlawag na a dagiti inasistiran da nga atleta ket nagpasar ti gasgas, nagpiskel ti saka wenno gurong, ken kaadoan ket dagiti naapektaran ti nakaro a kinabara ti temperatura iti Ferdinand Edralin Marcos Stadium.
Nupay kasta, inpasigurado ni Parado nga awan dagiti seryoso ti sinagaba na nga atleta bayat iti umuna nga aldaw a pannakaiyuswat dagiti nagduduma nga sporting events para iti Palarong Pambansa.
Kabayatanna, inpakaammo ni Parado nga adda ti inpaay da a fire truck iti kada Regional delegation tapno adda ti dagus a pagibagaan dagiti bisita no bilang maibusan dan ti danom.
Aminado met ni Parado nga adda ti panagkurang ti suplay ti danom ditoy probinsya karaman dagiti nagduduma a billeting areas ngem nasaganaan dan daytoy ken addan ti insigida a pagalaan da.
