LAOAG CITY – Umabot iti 60 a Vehicular Traffic Incident (VTI) ti nairekord ditoy probinsya idi Enero agingga ita a bolan ti Hunyo.
Daytoy ti inbatad ni Police. Major Sheryl Guzman, ti pannakangiwat iti Ilocos Norte Police Provincial Office (INPPO).
Segun kenni Guzman, nababbaba ti nasao a bilang no ikumpara kadagiti napasamak a disgrasya iti napalabas a tawen nga umabot iti 127.
Inpakaammo pay ni Guzman a manipud iti 60 a nairekord a Vehicular Traffic Incident ket 10 ditoy ti pimmusay, nababbaba ngem ti 25 a nairekord iti isu metlaeng a panawen idi 2024.
Inlawlawag na iti Bombo Radyo Laoag a ti kangrunaan a makaigapu kadagiti napasamak a disgrasya ket human error, impluwensya ti arak, nakaro a panagpataray ken mechanical conditions dagiti us-usaren a lugan.
Innayon na a ti kaadwan a nakapasamakan ti disgrasya ket ditoy ciudad ti Laoag, iti ili ti San Nicolas, Badoc ken iti ili ti Bacarra.
