LAOAG CITY – Inpasingked ni Dr. Rickson Balalio, mangidadaulo ti Provincial Health Office a 24/7 ti panangisayangkatda ti inventory checking ken restocking kadagiti kasapulan dagiti district hospitals pakairamanan ti provincial hospital.
Segun kenkuana, amin a balay-pagagasan ditoy probinsia ket addaan iti emegency cart, Emergency supplies pakairamanan ti life saving medication, trauma kits ken response medical tools.
Inlawlawagna a babaen iti daytoy ket saan a problema ti panagkurkurang dagiti kasapulan a kagamitan iti ospital.
Kunana nga ad-adda a puminpintas ti serbisio a maipapaay kadagiti agkasapulan gapu ta dagiti pasilidad a maus-usar ket sumaysayaat.
Kabayatanna, nagpalagip ni Dr. Balalio kadagiti motorista nga agan-annad ken ikkan ti disiplina iti panangiturongda kadagiti luganda nangruna ita a panawen ti panagtutudo tapno maliklikan ti aniaman a desgrasia.
