LAOAG CITY – Kritikal ti agpaidasig a para presidente idiay Colombia a ni Miguel Uribe Turbay, agtawen ti 39, kalpasan a napaltugan iti namintallo a daras kabayatan ti panagkampanya na iti ciudad ti Bogotá a kabiser ti pagilian.
Basar kadagiti otoridad, nagsagaba ni Turbay ti dua a tama ti bala iti ulo ken maysa iti tumeng na.
Dagus met a naarestar ti agtawen ti 15 a suspek.
Naamoan a napasamak ti pammaltog kabayatan ti panagbitla ni Turbay iti maysa a parke.
Nagpanawagan met iti publiko ti asawa ni Turbay a ni Maria Claudia Tarazona ti agtultuloy a panangikararag da para iti al-alisto a panagrekobre ti presidential candidate.
Iti agdama, manarimaan a maag-agasan ni Turbay iti Santa Fe Clinic no sadinno a mangiyus-uswat met ti prayer vigil dagiti supporters na.
Kabayatanna, naiget a kinondenar ti partido ni Turbay ken ti gobierno ti insidente ken inawagan da daytoy a panagatake kas pananglapped iti demokrasya ti pagilian.
Uray ni U.S. Secretary of State Marco Rubio ket kinondenar na ti nasao nga insidente.
Maipalagip a ni Turbay ket manipod iti mabigbig a pamilya iti politika idiay Colombia no sadinno a ti ina na a ni Diana Turbay ket mabigbig nga agirakrakurak a napapatay idi 1991 kalpasan a kinidnap ti Medellín cartel ni Pablo Escobar.
