LAOAG CITY – Nagbalin a naurnus ken naannayas ti panagsapata dagiti naelektaran nga opisyal iti intero a probinsya ken naisayangkat daytoy iti centennial arena ditoy ciudad ti Laoag ita nga aldaw, Hunyo 14, 2025.
Ti namagsapata ken ni Ilocos Norte 1st District Representative Sandro Marcos ket ni Barangay Chairman Racs Jerrick Ferrer iti Barangay Nagsanga iti ili ti Pasuquin, ken binayabay daytoy da Governor Matthew Marcos-Mantoc, Vice Governor Cecilia Araneta Marcos, Congressman Angelo Marcos Barba ken ni Paolo Bediones.
Iti panagbitla ni Marcos, nagyaman kadagiti amin a tumultulong ken mangsupsuporta kenkuana kangrunaan na iti pamilya na nupay saanda a nakaatendar iti panagsapata na gapu iti kaado ti pakakumikuman da.
Kagiddan iti daytoy, inpetteng na a nalpasen ti panawen ti pulitika ken dimtengen ti oras para iti serbisyo publiko no sadinno nga inpaganetget na a para iti ad-adda pay a pagsayataan iti probinsya ket lipatenen ti political colors imbes ket laglagipen dagiti umili.
Inkari na nga iti pannakaipaay manen kenkuana ti gundaway nga agserbi iti umuna a distrito ditoy probinsya ket itultuloy na dagiti nagduduma a programa ken serbisyo a pagsayaatan dagiti umili.
Karaman ditoy ti scholarship program, livelihood program para kadagiti mannalon ken mangngalap ken dadduma pay.
Nupay kasta, kuna ti kongresista a saan na a kabaelan nga aramiden amin dagitoy no awan ti panagtitinnulong, panagkaykaysa ken sangsangkamaysa a panagtrabaho ditoy probinsy.
Kabayatanna, inrakurak ni Congressman Marcos nga adda laengen ti tallo a tawen a nabatbati iti termino ti ama na a ni President Ferdinand Marcos Jr. isut gapuna a saan a sayangen daytoy a panawen no sadinno a sangsangkamaysa nga agtrabaho para iti pagsayataan ti probinsya.
