LAOAG CITY – Maalarma ni National Authority for Child Care (NACC) Executive Director Janella Ejercito Estrada iti agtultuloy a pannakairekord dagiti mailaklako a maladaga iti online.
Inyarig ti opisyal ti maysa nga entrapment operation nga inyuswat ti law enforcement agencies iti napalabas a bolan no sadinno a maysa a 7-day old a maladaga ti ginandat nga ilako ti lima nga indibidwal.
Gapu iti daytoy, immapela ti opisyal kadagiti Pilipino a makitinnulong iti panangparmek iti nasao a problema ken malapdan iti ad-adda pay a panagraira ti panaglako kadagiti maladaga ken ubbing.
Immapela pay ti opisyal iti publiko nga imbes a gumatang kadagiti ubbing ket suportaran laengen ti administrative adoption ken dadduma pay a wagas ti alternative child care, no kayat ti agampon wenno maaddaan ti ibilang nga anak.
Basar iti datos ti National Authority for Child Care, idi 2023 ket adda ti namonitor na a 23 a Facebook group nga agilaklako kadagiti maladaga ken ubbing.
Naaramid da nga ipababa agingga iti lima ti nasao a grupo ngem iti saan a nagbayag ket immado manen gapu iti aramid dagiti child trafficker.
Inlawlawag ni Estrada a makaalarma ti nasao a modus gapu ta maikabil iti risgo ti biag ken kinatalged dagiti ubbing wenno maladaga a mailaklako.
Inpalgak na a mabalin a dumteng ti panawen a maabuso dagitoy, maipadalan da iti child labor and exploitation wenno agpasar da ti organ harvesting.
