LAOAG CITY – Napadayawan kas 2025 NBA Champion ti Oklahoma City Thunder.
Naaramid ti Thunder nga abaken ti Pacers iti Game 7 iti iskor a 103-91 iti panangidaulo ni Shai Gilgeous-Alexander a kimmamada ti 29 points, 12 assists ken lima a rebounds iti uneg ti 40 a minuto a panagay-ayam.
Ginundawayan ti koponan ti injury ni Pacers guard Tyrese Haliburton tapno idonimar ti laban nangruna iti 3rd quarter no sadinno a nangaramid ti 2025 NBA Champion ti 34-20 run.
Iti umuna a kuarter ti laban ket nagsagaba ni Haliburton ti saan pay a masinunuo nga injury ken kinasapulan nga itaray dagiti medical staff isuna iti locker room.
Iti baet ti nabara a laban ket saanen nga inpabus-oy ti Thunder ken pinagtalinaedna ti napintas a lead iti panaglippas ti game 7.
Kabayatanna, napadayawan kas Finals MVP ni Gilgeous-Alexander kalpasan ti impresibo a performance iti sibubukel a playoffs agingga a naan-anay a nagun-od ti championship trophy.
