LAOAG CITY – Nakaawiden ditoy pagilian ti 31 nga Overseas Filipino workers (OFW) a nagbakwit manipod iti Middle East.
Sinabat a mismo dagiti kameng ti Overseas Workers Welfare Administration (OWWA) ken ti Department of Migrant Workers (DMW) dagiti nasao nga OFWs iti isasangpet da iti Ninoy Aquino International Airport.
Ti 31 nga OFW ket pakairamanan ti 26 a Pilipino manipod iti Israel, tallo manipod iti Jordan, ken saggaysa manipod iti Palestine ken iti Qatar.
Naglugan dagitoy iti Qatar Airways Flight QR 934 ken dimteng da iti NAIA pasado alas-8 ti rabii.
Isuda ti umuna a batch dagiti nagbakwit a Pilipino manipod iti riribok iti nagbaetan ti Israel ken Iran.
Inbatad ni DMW Secretary Hans Leo Cacdac nga apagapaman a naitantan ti flight gapu iti temporaryo a pannakasuspenso ti Qatari ti air traffic.
