LAOAG CITY – Inrakurak ti legal counsel ni dati a Negros Oriental Representative Arnolfo ‘Arnie’ Teves Jr. nga immanugot ti Manila Regional Trial Court Branch 12 nga agatendar laeng daytoy iti panagdengngeg babaen ti online video conferencing.
Basar ken ni Atty. Ferdinand Topacio, pinalubusan ti korte a saan nga agatendar a pisikal ti dati a kongresista iti naka-schedule a pannakadengngeg iti kaso na.
Daytoy ket gapu iti agdama a sitwasyon ni Teves kalpasan a dimmalan ti operasyon nga ‘appendectomy’ gapu iti nakaro a panagsaksakit ti buksitna.
Maipalagip a gapu iti sitwasyon ni Teves iti kallabes ket balbaliw a na-schedule ti nasao nga arraignment ken pre-trial ita a bolan ti Hulyo.
Ni Teves ket sumangsango ti agsusukot a kaso nga adda ti pakainaigan iti llegal possession of explosives and firearms, ken ti murder.
Maitudtudo ni Teves a maipagarop nga utek iti pannakapapatay ni dati a Negros Oriental Governor Roel Degamo ken 10 a sabsabali pay.
