LAOAG CITY – Pabor ti ad-adu a Pilipino nga agsubli manen ti Pilipinas iti International Criminal Court kas maibasar iti OCTA Research.
Iti naisayangkat a survey, manipud idi Abril 20 agingga iti 24, 57 a porsiento kadagiti Pilipino ti kalikagumda nga agsubli ti Pilipinas iti International Criminal Court idinto a 37 a porsiento ti saan nga umannugot iti daytoy nga addang ken 6 a porsiento ti awan ti sungbatda.
Nangipeksa ti suporta iti panagsubli iti International Criminal Court ti 60 a porsiento a respondents manipud iti Metro Manila, Balance Luzon ken Visayas.
Kabayatanna, iti Mindanao, 30% laeng ti mangayat nga agsubli manen ti pagilian iti International Criminal Court ken 66% ti saan a pabor.
Naammoan a kaaduan kadagiti pimmabor ket dagiti agtawen ti 18 agingga iti 24 idinto a dagiti manglaplapped ket dagiti agtawen ti 35 agingga iti 44 ken 45 agingga iti 54 iti nasao a tignay.
Ti survey ket nakipasetan ti 1,200 a lallaki ken babbai a respondents nga agtawen ti 18 ken agpangato a sinaludsod babaen ti face-to-face.
