LAOAG CITY – Insayangkat ti kompania a Joby Aviation ti kaunaan a test flight ti fully-electric air taxi-da idiay Dubai ita a lawas a maysa nga addang iti panagusar ti airborne transport iti siudad a mangrugi inton 2026.
Inbatad ni Anthony Khoury, General Manager ti Joby iti United Arab of Emirates, gagem ti proyekto a balbaliwan ti wagas ti panag-commute wenno panaglugan dagiti tattao. Manamnama a ti biahe manipud iti Dubai International Airport (DXB) nga agturong iti Palm Jumeirah ket agpaut laengen ti 12 a minuto babaen ti air taxi maidasig iti 45 a minuto iti kotse.
Iti baet a target ti Joby nga agbalin a nalaka ti serbisio para iti amin, manamnama nga iti rugi ket agbalin a nangina daytoy ken ad-adda a nakapokus kadagiti addaan ti nangato a biruk.
Nadakamat nga inaramid ti test flight iti disyerto a lugar iti ruar ti siudad nga inatendaran dagiti opisial manipud iti gobierno ken transport sector.
Inpakita ti aircraft ti kabaelanna a tumayab a nakapatakder, tumayab iti sumagmamano a milya ken agsubli iti panag-landing daytoy.
Ti Joby Aerial Taxi ket maysa nga electric vertical take-off and landing (eVTOL) aircraft nga adda ti kabaelanna a tumayab ti agingga iti 160 a kilometro ken dumanon iti kapaspas a 320 a kilometro iti kada oras.
Daytoy ket zero-emission ken saan unay a natagari tapno mausar kadagiti dupudop a lugar.
Iti baet ti potensyal, sangsangoen latta ti industria ti electric vertical take-off and landing dagiti karit iti pagannurotan ken imprastruktura.
Daytoy ket kalpasan a bimmaba ti stock price forecast ti Joby gapu kadagiti risgo iti aerospace sector ngem agdama nga adda iti $10.55 ti balor ti stock-da.
