LAOAG CITY – Napilaanen ti kaso a frustrated theft ti agtawen ti 18 a barito a nangserrek iti maysa a balay iti Barangay 11, Sta. Rosa iti ili ti Sarrat.
Daytoy ti inpakaammo ni Police Capt. Ashley Cacayorin, ti chief of police iti ili ti Sarrat.
Inbatad ni Cacayorin nga iti agdama ket nagtalinaed ti suspek iti kustodyar ti Philippine National Police iti nasao nga ili.
Adda met ti nairekomendar a 3 ribo a pisos a pagpiyansa ti suspek para iti temporaryo a pannakawaya-waya na.
Maipalagip a naarestar ti suspek kalpasan a nagtakaw ti sumagmamano nga alahas pakairamanan ti dua a pares ti aritos, maysa a gold necklace, maysa a bracelet nga addaan ti uppat a rings ti diamond stones nga agbalor ti 70 a ribu a pisos ken maysa a tulbek ti pagtaengan a mapapati nga inusar ti suspek tapno makastrek iti pagtaengan.
Immuna metten nga inadmitir ti suspek a datin nga ar-aramidenna ti agserrek kadagiti pagtaengan tapno agtakaw.
Inbatadna a ti pagtaengan a nakatiliwan ti suspek ket namin-adun a daras a sinerrekna ngem saan laeng a madukduktalan dagiti akinkukua ti balay.
