LAOAG CITY – Naawagan kas kaubingan a nagbalin nga School Principal iti Department of Education ni Atty. Donato Balderas Jr. iti tawenna a 25.
Segun kenkuana, maysa a bulan pay laeng daytoy a simrek iti Department of Education ket nadutukan isuna kas Officer In Charge iti kaluklukat a baro a pagadalan iti tawenna a 22.
Inbatadna a kalpasan ti tallo a tawen ket nai-promote daytoy kas full-fledged School Principal iti tawenna a 25 nga ipanpannakkelna agpapan iti daytoy a gundaway.
Kunana nga agtawen daytoy ti 36 idi simrek iti College of Law ken nagturpos daytoy iti tawenna nga 40.
Inlawlawagna a narigat ti panagadal iti abogasia nangruna ket kasapulanna ti mangisuro iti bigat ken agadal iti rabii.
Inpasingkedna a maysa a tawen ti naglabas kalpasan a nagturpos isuna iti kina-abogasia idi nangala ti eksaminasion para iti Bar Examination no sadinno nga insigida daytoy a nakapasa iti tawenna nga 42.
Mainaig iti daytoy, nagserbi ni Atty. Balderas Jr. kas Schools Division Superintendent idiay Dagupan City, Vigan City, San Carlos City, Pangasinan Division II, La Union ken ditoy Ilocos Norte iti agdama.
Kabayatanna, naammoan a dagiti nagannakna ket maysa a barbero ken housewife ngem saan a nagbalin a tubeng kadakuada nga agkakabsat tapno makapagturpos iti panagadal.
