LAOAG CITY – Nasugatan ti maysa a lalaki kalpasan a napaltugan iti Brgy. 13, Magat-Salamat ditoy ciudad ti Laoag.
Basar iti nakalap nga impormasyon ti News Team ti Bombo Radyo Laoag, rumrumuar a nabarteken ti biktimaa nabigbig ti nagan na nga Edmund Pasion idi mapan koma manen gumatang ti inumen na nga arak.
Nupay kasta, maipagarop a kabayatan ti pannagna na ket makaringgor ken rumrumuar a nagibarsak pay ti botelya.
Gapu iti daytoy, possible a nasuron ti saan pay a nainaganan a suspek isut gapuna a pinaltugan na ti biktima.
Naitaray ti biktima iti Mariano Marcos Memorial Hospital and Medical Center iti ciudad ti Batac para iti naan-anay a pannakataming na.
Agpapan maisursurat daytoy a damag ket awan pay ti inparuk-at a detalye wenno aniaman nga impormasyon ti Philippine National Police mainaig iti nasao a pasamak.
