LAOAG CITY – Inpakaammo ni Barangay Chairman Eduardson Santos ti Barangay 13 Magat-Salamat ditoy siudad ti Laoag a rumrummuar a nabartek ti abugado a suspek iti pammaltog idi napasamak ti insidente.
Segun kenkuana, apaman a nakaawat ti tawag manipud iti maysa a concerned citizen maipanggep iti insidente ket insigida daytoy a napan nagresponde kaduana dagiti barangay tanod.
Inbatadna a nakitana nga adda dagiti nabubuong a bote iti kalsada iti sangoanan ti pagkaskaseraan ti suspek.
Inlawlawagna nga insigida met nga insuko ti suspek ti paltogna ken inpakitana ti lisensia daytoy.
Innayonna nga awan met dagiti immun-una a nakairamraman a riribuk ti suspek kabayatan ti panagtalinaedna iti barangayda.
Maipalagip a mapan koma gumatang ti arak ti biktima a ni Edmund Pasion ngem pinaltogan daytoy ti suspek ti naminsan a daras iti bukutna.
