LAOAG CITY – Inpakaammo ni Dir. Laurence Mina, Chairperson ken Regional Director ti Office of Civil Defense ti rehion uno a maibilang a kapigsaan ti magnitude 5.8 a gingined a narikna ditoy Ilocos Norte sipod idi Enero 2025.
Segun kenkuana, basar iti inisyal a datos iti opisinada ket awan dagiti nairekord a nadadael wenno nadangran gapu iti napasamak a gingined.
Nupay kasta, adda ti naawatda a report nga adda ti agarup 100 nga estudiante ti naulaw gapu iti insidente.
Inlawlawagna a malaksid ditoy Ilocos Norte ket narikna pay ti gingined idiay probinsia ti Ilocos Sur ken La Union.
Kunana nga awan ti nairekord nga aftershocks ken awan ti naiyetnag a tsunami alert gapu iti gingined.
Innayonna nga iti agdama ket manarimaan pay laeng ti assessment dagiti nagduduma a Local Disaster Risk Reduction and Management Council maipanggep kadagiti imprastraktura a posible a nadadael gapu iti gingined.
