LAOAG CITY – Malidayan ken nadismaya ni dati ACT Teachers Partylist Rep. France Castro iti nagbalin a desision ti Korte Suprema mainaig iti impeachment ni Vice President Sara Duterte.

Segun kenkuana, saanna nga inpagarup a daytoy ti agbalin a desision ti Korte Suprema no sadinno nga ad-adda pay a kinanunongan dagiti Associate Justice ti Bise Presidente.

Inbatadna a dakkel ti epekto ti saan a panangikagumaan ni Presidente Ferdinand Marcos Jr. iti pannaka-impeach ni Vice President Sara iti desision ti Korte Suprema.

Inlawlawagna nga ibilangna ti nagbalin a desision ti Korte Suprema nga arig mangliliput kadagiti Pilipino.

Kunana a kalikagumna a maaddaan ti motion for reconsideration iti Korte Suprema dagiti miembro ti prosecutor team ti 20th Congress.

Maipalagip a ni Castro ket maysa kadagiti 215 a kongresista a nangiendorso ti maikapat nga impeachment complaint kontra ken ni Vice President Duterte.

Immuna iti daytoy, indeklarar ti Korte Suprema a ti Articles of Impeachment a naipila kontra iti Bise Presidente ket unconstitutional.