LAOAG CITY – Umabot iti pito nga istruktura ti nadadael a bukbuklen dagiti babbalay ken panganan ti naapektaran iti idadalapos ti napigsa nga alipogpog a nagpaot ti 2 agingga ti 3 a minuto iti Barangay Nagbacalan iti ili ti Paoay.
Segun ken ni Mayor Shiela Galano, adda ti maysa a karinderya ti naminpinsan a nadadael kalpasan a natupakan ti dakkel a kayo idinto a dagiti dadduma ket naitaytayab ken nakupkuppit dagiti galba da.
Inpasingked ni Mayor Galano a saan da a baybay-an dagiti naapektaran a residente gapu ta malaksid iti pinansyal a tulong ket kitaen da pay no ania dagiti mabalin da a maitulong kas kadagiti materyales tapno al-alisto ti pannakatarimaan dagiti naapektaran a balay ken panganan.
Kuna pay ti mayor nga inpakaammo da a dagus ti napasamak iti gobierno probinsyal partikular kada Governor Cecilia Araneta-Marcos ken ni Vice Governor Matthew Marcos-Manotoc, tapno agkiddaw ti nayun a tulong para kadagiti naapektaran a residente.
Iti baet ti napasamak, nagyaman ti mayor gapu ta awan ti nadangran iti insidente.
Mainaig iti daytoy, inbatad ni Mr. Jesus Bacena, ti mangidadaulo iti Local Disaster Risk Reduction and Management Office iti ili ti Paoay a nagturong da a dagus iti nadakamat a barangay kadwa da dagiti kameng ti Philippine National Police, Bureau of Fire Protection, ken dagiti opisyal ti barangay, pakairamanan dagiti barangay tanud para iti pannakaiyuswat ti clearing operation.
Inrakurak ni Bacena nga adda pay dagiti sumagmamano a poon ti kayo a nagtupak idinto nga adda ti maysa a poste ti kuryente a nagabut ken naitayab agingga iti 10 a metro.
Innayon na a tapno al-alisto a mawaknitan ti lugar ket nagusar da ti backhoe aglalo kadagiti nabuwal a poon ti kayo ken ti nagabot a poste ti kuryente.
Kabayatanna, inyistorya ni Mary Joyce Agapay a bayat ti panangiplasplastar na kadagiti lakona nga street foods ket bigla a nagangin ti napigsa manipod iti baba a nakairamraman a naiyangin dagiti tagilako.
Kuna nga iti dayta a gundaway ket inarakopna ti anakna nga adda iti abayna ken napan da naglemmeng iti kaabay da a tianggi.
Inpakaammo na a kalpasan a nagsardeng ti napigsa nga angin ket nakita na laengen nga awanen ti galba iti garahe da ken dagiti panganan iti sangoda.