LAOAG CITY – Inrakurak ti Philippine National Police nga adda ti 12 ribu a pulis ti naiwaras idiay Quezon City para iti maikapat nga State of the Nation Address wenno SONA ni Presidente Ferdinand Marcos Jr.
Inbatad ni Philippine National Police spokesperson Police Brigadier General Jean Fajardo nga idi kalman pay laeng ket naiwarasen dagitoy.
Inlawlawagna nga awan ti maaw-awatda a seryoso a pangta ti Philippine National Police nga adda ti pakainaiganna iti State of the Nation Address.
Nupay kasta, kunana a saanda nga agpakampante isu a naiget ti pannakikoordinarda kadagiti dadduma pay a law enforcement agencies kangrunaanna iti Armed Forces of the Philippines tapno maliklikan ti aniaman a pangta.
Innayonna nga adda ti naipatungpal nga anti-criminality measures pakairamanan ti police checkpoint ken Task Force Manila Shield.
Kabayatanna, nasuspenso met ti serrek kadagiti amin a lebel a pampubliko ken pribado a pagadalan idiay Quezon City ken naipatungpal ti liquor ban.
