LAOAG CITY – Inrakurak ni Presidente Ferdinand Marcos Jr. nga awanen ti bayadan dagiti pasiente a ma-admit iti Department of Health hospitals iti intero a pagilian.
Daytoy ti maysa kadagiti inpakaammo ni Presidente Marcos iti maikapat nga State of the Nation Address wenno SONA-na.
Segun iti Presidente, iti babaen ti “zero balance billing” a maipatpatungpal kadagiti amin a 87 a Department of Health hospitals, maipadanon kadagiti pasiente dagiti serbisio ti basic ken ward accommodation.
Nupay kasta, saan met a sakupen ti zero balance billing dagiti pasiente a pilienda nga umakar kadagiti private rooms.
Kabayatanna, malaksid iti zero balance billing, mabalinen nga iproseso ti Medical Assistance to Indigent and Financially Incapacitated Patients wenno MAIFIP program iti babaen ti eGov app a nairubuat iti kallabes para iti napaspaspas, transparent ken accessible a government services.
Kabayatanna, nangrugi idi 2011 idi inpatungpal ti PhilHealth ti zero wenno “no balance billing” kadagiti accredited government health care institution ken dagiti pribado nga ospital a boluntario a mangipatpatungpal ti “no balance billing” policy.
