LAOAG CITY – Nagballigi dagiti otoridad a nangarestar iti maysa a lalaki iti naisayangkat nga anti-illegal drug buy-bust operation iti Barangay 35, Bil-loca iti ciudad ti Batac.
Ti suspek ket agtawen ti 43, naasawaan, caretaker, ken residente iti Barangay Dariwdiw iti nadakamat a ciudad.
Inarestar a dagus dagiti otoridad ti suspek kalpasan a naglako ti maysa a sachet a naglaon ti maatap a shabu iti nagpammarang a poseur buyer.
Iti panangkapkap dagiti otoridad iti suspek ket nakumpiskar da pay iti ikotna ti 5 a sachet a naglaion metlaeng ti maipagarop a shabu nga agdagsen ti 1.6 gramo ken ti P1,000.00 a nausar iti operasyon.
Ti suspek ket maibilang kas newly Identified Drug personality iti ciudad ti Batac ken nabayagen nga imonmonitor dagiti otoridad.
Nagtalinaed ti suspek iti Philippine National Police iti ciudad ti Batac ken maisagsaganan ti maipila a kaso a panaglabsing iti Republic Act 9165 wenno Comprehensive Dangerous Drugs Act of 2002 kontra kenkuana.
