LAOAG CITY – Naiget ti pammilin ni P/Col. Joemar Labiano, Provincial Director ti Ilocos Norte Police Provincial Office kadagiti kapulisan ditoy probinsia iti pannakaipatungpal ti 5-minute response time.
Inbatadna nga adda ti napasamak a pammaltog iti kallabes ditoy probinsia no sadinno nga insigida met a nakapagresponde dagiti pulis iti uneg ti lima a minuto.
Inlawlawagna a daytoy ket pammaneknek nga alerto dagiti kapulisan ditoy probinsia iti sadinnoman a lugar wenno aniaman nga oras.
Kunana nga in-inot nga agbalin a gagangay kadakuada a kapulisan ti pannakaipatungpal iti nasao a programa ti nailian a pulisia.
Innayonna a ti 5-minute response time ket masapul nga ipakat dagiti amin a pulis iti panagresponde dagitoy iti emerhensia, insidente wenno krimen.
Immuna iti daytoy, inbilin ni Philippine National Police Chief Police General Nicolas Torre III ti naiget a pannakaipatungpal ti 5-minute response time kadagiti amin a pulis iti intero a pagilian.
