LAOAG CITY – Inlawlawag ni Lt. Col. Luis Banoey, Commander iti 77th Infantry Battalion a nakabase iti ili ti Vintar ti isyu a maipagarop nga adda dagiti miembro ti 102nd Infantry Battalion of the Philippine Army nga illegal a napan nangarestar iti dua a mannalon iti Barangay Dampig iti ili ti Pagudpud.
Inbatad na nga awan ti kinpudno na ti alegasyon gapu ta awan ti otoridad da a mangarestar ti maysa nga indibidual.
Segun ken ni Banoey, naamoan ti dua a kabsat ti maysa a mannalon nga iti Barangay Dampig ti pagnanaedan na isut gapuna a napan da nagpatulong kadakuada no kasano a makapan iti nadakamat a lugar.
Naamoan a nabayagen a saan a nagkikita dagiti agkakabsat.
Inpakaammo pay ni Banoey nga isuda ti nagpatulongan dagiti agkabsat gapu ta ti maysa kadagiti miembro da ket nasinged a kabagyan dagiti maseknan.
Innayon na a dua dagiti tropa da a napan nangkuyug kadagiti agkabsat ken saandan a nag-uniporme pay ken awan ti intugot da nga armas gapu ta saan met nga operasyon ti nagturungan da.
Mainaig iti daytoy, naragsak met ti mannalon iti panagkikita da kadagiti kakabsat na ken kalpasan ti panagsasarita da ket nagkukuyog da a nagawid iti probinsya da idiay Ifugao.
Masdaaw ni Banoey no apay a naikkan ti sabali a kaipapanan ti panangkuyog dagiti kakadwa da kadagiti agkabsat a napan laeng nagpatulong kadakuada ken saan da met a pwinersa nga innala ti madakdakamat a mannalon iti ili ti Pagudpud.
