LAOAG CITY – Kinumpirmaran ni Hon. Cheryll Tabangay, Indigenous Peoples Mandatory Representative ti Sangguniang Panlalawigan nga adda dagiti sumagmamano a miembro ti Indigenous People ditoy probinsia a maipagarup a saan a mabenbenipisiaran kadagiti sumagmamano a programa ti gobierno.
Inbatadna a kabayatan ti panangbisitana kadagiti nagduduma a tribo ditoy probinsia ket daytoy ti kangrunaan nga arungaing nga ipadpadanonda kenkuana.
Inlawlawagna nga adda dagiti mangbabalaw kadagiti kapitan gapu ta maipagarup a pilpilienda dagiti ilistada.
Kunana a karaman ditoy ket ti pannakaipaay ti ayuda nga in cash ken adda met dagiti in kind kas kadagiti kasapulan dagitoy para iti panagtalon.
Gapu iti daytoy, plano ni Tabangay a makisarita kadagiti kapitan pakairaman dagiti miembro ti Indigenous People ditoy probinsia tapno mapagsasaritaan ken masolbar daytoy a naimbag.
