LAOAG CITY – Natay ti maysa a kameng ti Lesbian, Gay, Bisexual, Transgender Queer (LGBTQ) idinto a nasugatan ti lubbon na kalpasan a naidungpar ti nagluganan da a motorsiklo iti patrolcar ti Philippine National Police ditoy ciudad ti Laoag.
Segun ken ni Police Capt. Rudy James Jacalne, ti Deputy Chief of Police ditoy ciudad ti Laoag, napasamak ti insidente iti Rizal St., Corner Balintawak St. kabayatan ti panagturong ti patrolcar iti Gilbert Bridge tapno adda ti respondean da a disgrasya.
Inbatad ni Jacalne a basar iti imbestigasyon ket immuna a naginom ti nasanger dagiti biktima nga agpada a residente iti Barangay 7A ditoy ciudad, iti asideg ti maysa a bakery ken idi agawid da koman ket ditoy metten a napasamak ti insidente.
Inlawlawag ni Jacalne a ti kalsada a nakapasamakan ti disgrasya ket one-way laeng ken ti laeng mabalin a magna ket dagiti behikulo nga agpaamyanan isut gapuna a nakigtot dagiti pulis a nakalugan iti patrolcar idi rumuar dagiti biktima iti daytoy.
Inpakaammo ni Jacalne a naitaray a dagus dagiti biktima iti Governor Roque Ablan Senior Memorial Hospital ngem naiyakar dagitoy iti Mariano Marcos Memorial Hospital and Medical Center no sadinno a naideklarar ti driver ti motorsiklo.
Innayon na a nagsagaba dagiti biktima ti sugat iti nagduduma a paset ti bagida kangrunaan na iti ulo da gapu ta ti laeng driver ti adda helmetna ngem maipagarop a saan pay a nakasuot kenkuana.
Gapu iti napasamak, inbatad ni Jacalne a pinagtalinaed da paylaeng iti police station ti pulis a nangiturong iti patrolcar kabayatan ti maiyus-uswat nga imbestigasyon.
