LAOAG CITY – Inpakaammo ni Engr. Jonathan Corpuz, Branch Manager ti National Food Authority – Ilocos Norte Branch a nasken a nakarehistro iti Registry System for the Basic Sectors in Agriculture dagiti benepisiario ti Benteng Bigas Meron Na para sa magsasaka program.
Segun kenkuana, adda ti 189 a mannalon ti nakipagpaset iti nasao a programa ti gobierno babaen ti Department of Agriculture iti umuna nga aldaw a pannakairubuat daytoy.
Inbatadna a mabalin a gumatang dagiti maseknan a mannalon ti 10 a kilo ti bagas iti kada bulan agingga iti 50 a kilo wenno maysa a kaban ti bagas para ita a tawen 2025.
Inlawlawagna nga iti agdama ket ipangpangrunada pay laeng dagiti mannalon a saan a sumurok iti dua nga ektaria ti kalawa ti taltalonenda.
Kunana a masapul nga ipakita dagiti mannalon ti Registry System for the Basic Sectors in Agriculture ID ken aniaman a government issued ID dagitoy tapno makagatangda ti nalaka a bagas.
Innayonna a makikoordinar daytoy kadagiti nagduduma a City ken Municipal Agriculture Office tapno maiplastar ti maikeddeng nga schedule iti panaggatang dagiti mannalon iti National Food Authority – Ilocos Norte Branch.
