LAOAG CITY – Makapaspasar ti Gaza City ti kumarkaro a panagbisin.
Basar iti Integrated Food Security Phase Classification (IPC) system, adda ti 514 a ribu a Palestinians idiay Gaza ti makapaspasar ti panagbisin a manamnama pay a ngumato ti bilang dagitoy agingga iti 641 a ribu iti panagngudo inton bulan ti Septiembre.
Mainaig iti daytoy, kadagupan iti nasao a bilang 280 a ribu kadagitoy ket adda iti northern region iti Gaza City ti mabisbisin iti uneg ti agarup dua a tawen sipod nangrugi ti rinnupak iti nagbaetan ti Israel ken Hamas.
Gapu iti daytoy, 20 a porsiento kadagiti tattao ti makapaspasar ti nakaro a panagbisin, maysa kadagiti tallo nga ubbing ket malnourished ken dua a tao iti 10 a ribu ti matmatay iti kada aldaw gapu iti panagbisin, malnutrition ken sakit.
Segun iti Integrated Food Security Phase Classification, iti kallabes ket ti Somalia, South Sudan ken Sudan laeng dagiti nairekord a pagilian nga adda ti panagbisin dagitoy.
Inbatad ni United Nations Secretary-General Antonio Guterres a ti panagbisin idiay Gaza ket man-made disaster, moral indictment ken pannakapaay iti humanity.
Nagpanawagan daytoy ti insigida a pannakaipatungpal ti ceasefire, pannakawaya-waya dagiti hostage nga iggem ti Hamas ken ti saan a pananglapped iti humanitarian access.
