LAOAG CITY – Naragsak nga inpakaammo ni Mr. Joefrey Bulalaque a residente iti Barangay 4 iti ili ti San Nicolas a manipud iti dati a promoter daytoy ti gadget ket addan ti bukudna a siam a branch iti paglakoan ti cellphone iti agdama.
Segun kenkuana, anos ken diskarte ti maysa kadagiti kangrunaan a nagbalin a tulbekna tapno agballigi ti negosiona.
Inbatadna a masarakan dagiti puesto ti negosiona iti ili ti San Nicolas, Badoc, Vintar, Bacarra pakairamanan dagiti adda iti dua a dakkel a mall ditoy probinsia.
Kunana a dagiti ididiayada a serbisio ket ti cellphone repairs, accessories, casing, baterya ken dadduma pay.
Inlawlawagna a saan man a nakapagturpos iti kolehio ket saan daytoy a nagbalin a tubeng tapno makapatakder ti bukudna a negosio.
Mainaig iti daytoy, kuna ni Bulalaque a dimmalan pay daytoy kadagiti nagduduma a panagsanay tapno maipasigurado a kabaelanna nga imanihir ken ipataray met laeng ti negosio daytoy.
Naammoan nga adda ti dua agingga iti tallo nga empleado ti mangbanbantay ti tunggal branch ti negosiona.
Innayonna a masapul nga annadan ti talek dagiti customer tapno saan a mapaay dagitoy ken agtultuloy ti panagtalekda kadakuada.
