LAOAG CITY – Kalikagum ni Vice Gov. Matthew Marcos Manotoc a maititulo dagiti ancestral domain dagiti indigenous people.
Segun kenkuana, kaaduan kadagiti indigenous people ket awan pay titulo dagiti dagada kas iti ili ti Adams.
Gapu iti daytoy, kiniddawna ken ni Hon. Cheryll Tabangay, Indigenous Peoples Mandatory Representative ti Sangguniang Panlalawigan a masapul a makikoordinar daytoy ken ni Atty. Jifford Rosqueta ken ni Atty. Franklin Respicio tapno matulungan dagiti kabsat nga indigenous people.
Naammoan a namunganay daytoy kalpasan a naidasar ni Bokal Aladine Santos ti pannakaipasigurado nga awan ti maapektaran nga ancestral domain kadagiti development ditoy probinsia kas ti Philippine Economic Zone Authority wenno PEZA gapu ta adda dagiti proyekto iti napalabas a nakaapektar kadagitoy nga agingga ita ket saan pay a nasolbar.
