LAOAG CITY – Awan ti sakit ti nakem ni dati a Philippine National Police Chief General Nicolas Torre III kalpasan a naikkat kas hepe ti nailian a pulisya.
Iti interview iti Kamara de representantes, inbatad ni Torre nga agtalinaed ti suporta na ken ni Presidente Bongbong Marcos ken awan ti pagbabaywan na.
Inadmitir ti dati nga hepe ti nailian a pulisya a naawat na nga awan ti permanente iti pwesto.
Nagkedked metten ni Torre a nangsungbat ti saludsud kenkuana no awaten na ti aniaman a posisyon iti gobierno a mabalin a maidiaya kenkuana.
Kuna na nga urayen laengen ti opisyal nga announcement no adda ti maidiaya kenkuana a baro a posisyon.
Kinumpirmaran met ti opisyal a naituding nga ag-file ti leave of absence gapu ta agpapan ita ket pulis paylaeng daytoy.
Iti baet dagiti napasamak ket inrakurak ni Torre a saan a bitter ken kas pammaneknek ket nakasagana a mangipaay ti balakad iti baro a Philippine National Police chief a ni PLt.General Jose Melencio Nartatez nga inawagan na kas “very good police officer”.
Inlawlawag pay ni Torre nga “in good terms” da ken ni Department of Interior and Local Government Secretary Jonvic Remulla.
Kabayatanna, inpakaammo ni Torre a bimmisita iti Kamara de representantes tapno personal a kablaawan ken ipaayan ti cake ni Mamamayang Liberal Partylist Representative Leila De Lima para iti kasangay na.
Immunan a kwinestyunaran ni de Lima ti panagulimek ni Presidente Ferdinand Marcos Jr. iti pannakaikkat iti pwesto ni Torre.
