LAOAG CITY – Natay ti dua nga ubbing kalpasan a napaltu-paltogan iti maysa a Catholic School idiay Minneapolis, Minnesota.
Napasamak ti insidente kabayatan a maisaysayangkat ti misa iti Annunciation Catholic School no sadinno nga inserra ti suspek a ni Robin Westman ti dua a ridaw ti pagadalan kagiddan ti panangpaltu-paltogna.
Nasugatan ti 17 nga indibiduala kaaduan ditoy ket dagiti ubbing ken naitaray dagitoy iti ospital.
Naammoan a dagiti pimmusay a biktima ket agtawen ti innem ken walo.
Mainaig iti daytoy, kalpasan ti sumagmamano a minuto ket nakita dagiti otoridad iti bisinidad ti pagadalan ti suspek nga awananen ti biag.
Mamati dagiti otoridad a plinano a naimbag ti suspek ti pammaltog ken inadalna dagiti aktibidad iti pagadalan.
Gapu iti insidente, inbilin ni United States President Donald Trump nga ikabil iti half-staff ti bandera ti Amerika a nakaikabil kadagiti opisina ti gobierno agingga inton aldaw ti Domingo.
Napalaos met ti panagladingit ni Pope Leo XIV idi naammoanna ti insidente.
Inbatad ni Vatican Secretary of State Pietro Parolin, idanon ti Santo Papa ti pannakipagladingitna kadagiti maseknan a pamilia dagiti biktima.
Inkararaganna ti biktima pakairamanan dagiti first responders ken dagiti kameng ti simbaan iti nasao a pagadalan.
