LAOAG CITY – Manarimaan ti panang-validate ti Bureau of Immigration ti travel records dagiti personalidad a karaman iti maikadua a batch ti naisyu nga immigration lookout bulletin order seknan iti anomalya a flood control projects.
Segun kenni Bureau of Immigration spokesperson Dana Sandoval, ur-urayen da pay laeng ti kumpleto a listaan iti travel records dagiti maseknan.
Inbatad na a sumagmamano kadagiti 35 a prsonalidad nga adda iti ummuna a batch iti lookout order ket nakarwar da iti pagilyan iti pay maudi a paset ti Agosto ngem nakasubli dan dagitoy.
Inpakammo met ni Sandoval a saan na pay a naiublikar ti katatao dagiti nadakamat nga indibidual a rimuar iti Pilipinas agingga a maisubmitir da iti Department of Justice ti kumpleto a report.
Umunan a pinirmaan ni Justice Secretary Jesus Crispin Remulla ti initial batch ti immigration lookout bulletin order kontra kadagiti 35 a contractors ken opisyales ti Department of Public Works and Highways nga adda ti pakainaigan na iti anomalya a flood control projects iti pagilyan.
Idi laeng met kalpasan ket nairakurak nga umabot iti 43 nga indibidual a maipagarop a karaman iti kwestyunable a proyekto ti adda iti maikadua a batch ti immigration lookout bulletin order.
Ti immigration lookout bulletin order ket isu ti mangmandar kadagiti immigration officers a kitaen a nasayaat no adda ti nakapenpen nga arrest warrants kontra kadagiti maseknan, anyaman a panaglabsing wenno infraction, ken imonitor ti itineraries no aggandat da a rumuar iti pagilyan.
Ummunan nga inbatad ni Bureau of Immigration Commissioner Joel Anthony Viado a ti immigration lookout bulletin order ket para iti pannakamonitor laeng dagitoy ken saan a makaanay tapno malapdan da a rumuar.
