LAOAG CITY – Inlawlawag ti legal team ni dati a Presidente Rodrigo Duterte ti rason ti panagkiddaw da ti adjourn proceedings iti sangsangwen na a kaso nga adda ti pakainaigan na iti war on drugs iti International Criminal Court.
Segun kenni Nicholas Kaufman, ti lead counsel ni Duterte, makapaspasar ita ti agtwen ti 80 a dati a presidente ti ‘cognitive impairment’ isut gapo na a saan a rumbeng nga agatendar iti panagdengeg.
Inbatad na pay nga uray dagiti annak na ket saanen a mabigbig ti dati a presidente ken saan na amalagip dagiti kaso a sangsangwen na iti agdama.
Gapo iti daytoy ket mamati da a saan a sumayaat ti salun-at ti dati a presidente rason a kiniddaw da iti Pre-Trial Chamber a masapol nga i-adjourn dagiti amin a legal proceedings iti kaso na.
Nagisubmitir da pay kadagiti extensive medical information ti dati a presidente iti ICC.
Ummunan a kiniddaw ti kampo ti dati a presidente nga ipalubos ti gobierno ti Pilipinas ti panagawid na no maapribaran ti interim release.
