LAOAG CITY – Surpresa a bimmisita ni Prince Harry idiay Kyiv kalpasan nga inimbitaran ti organisasyon a manguspsuportar kadagiti Ukrainians a nagsagaba ti nakana a sugat a nangitunda ti pannakapukaw da ti dua a saka ken dadduma a paset ti bagida gapu iti gubat.
Inbatad ti Duke of Sussex a kayatna nga aramiden amin ti possible a makatulong para iti alisto a pannaka-rekobre dagiti nasugatan ken nabaldado a military personnel.
Nagturong ni Prince Harry idiay Ukraine babaen ti panaglugan na ti tren ken daytoy ti kaunaan a gundaway nga ibibisita na iti Kyiv.
Karaman kadagiti inkari nga ipaay a tulong ni Prince Harry ket dagiti prosthetic limbs ken dadduma pay.
Naamoan nga umabot iti agarop 10 ribo a a soldado ken sibilyan dagiti nabaldado gapu iti gubat idiay Ukraine.
Mainaig iti daytoy, nagdonar pay ni Prince Harry ti $500,000 iti Archewell Foundation para kadagiti proyekto da a mangsupsuporta kadagiti nasugatan nga ubbing manipod iti Ukraine ken Gaza.
Innayon na a ti nasao a kantidad ket mausar tapno tumulong iti World Health Organization para iti medical evacuations, ken para kadagiti prosthetics a maipaay kadagiti agtutubo.
Maipalagip nga uray ti dadduma a miembro ti Royal Family ket inpeksa da ti suporta da iti Ukraine sipud nangrugi ti gubat, addan nasurok a tallo a tawen ti napalabas.
Ti ibibisita ni Prince Harry iti Ukraine ket napasamak kalpasan a nakipagkita iti ama na a ni King Charles idiay London idi miyerkules, ti kaunaan a face-to-face meeting da sipud idi Pebrero 2024.
