LAOAG CITY – Nabenepisiaran ti agarup maysa a ribu a pasiente ti serbisio medikal kagiddan iti maika-68 a panagkasangay ni Pres. Ferdinand Marcos Jr. ita nga aldaw.
Daytoy ket kas paset iti pannakaisayangkat ti programa ti gobierno nga Handog ng Pangulo Serbisyong Sapat Para Sa Lahat.
Segun ken ni Dr. Rhuel Bobis, mangidadaulo ti Department of Health Ilocos Center for Health Infectious Diseases Cluster, naidiaya kadagiti pasiente ti Outpatient Services kadagiti amin a Department of Health Hospitals ken Bagong Urgent Care and Ambulatory Services wenno BUCAS Centers.
Malaksid iti daytoy, kunana a naidiaya pay ti Community Medical Services kas ti Medical Consultation and Provision of Medicines, Nutrition Counselling/Assessment, Oral Health Services, Immunization kas ti Pneumonia ken Flu Vaccine, Screening kas ti Cervical Cancer Screening ken Breast examination, Diabetic Retinopathy Screening, HIV Screening, TB Screening ken Mental Health Assessment.
Mainaig iti daytoy, inbatadna nga adda ti naisayangkat a Minor OR Procedures, Newborn Screening, Laboratory Services kas ti CBC, Urinalysis, ABO Typing with Rh typing, Radiology Services kas ti Chest X-ray and Ultrasound, Wellness Clinic kas ti Massage, Acupuncture ken dadduma pay.
Kabayatanna, ibilang ni Mrs. Melinda Quinones, maysa kadagiti nanggundaway iti nasao a programa a dakkel daytoy a tulong para kenkuana no sadinno a nagpaagas isuna para iti panaguyek ken panateng.
Innayonna nga alisto ti panangipaay ti serbisio medikal kadakuada a senior citizen.
